Langabezia-prestazio baten ordainketa okerra jaso duzula jakinarazten duen ebazpena jasotzen duzunean, eta bertan itzuli beharreko zenbateko zehatza adierazten denean, honako aukera hauek dituzu:

• 2023ko abenduaren 21etik aurrera, zenbateko horren konpentsazio partziala eskatu dezakezu. Horrek aukera emango dizu aitortutako prestazioaren edo subsidioaren zati bat kobratzeko, betiere konpentsazio-eskaera zorra biltzeko exekuzio-bidea hasi baino lehen aurkezten baduzu.
• Ordainketa okerraren zenbatekoa zatika ordaintzea eskatu dezakezu. 

Ordainketa zatitzea interesatzen bazaizu, eskaera idatziz aurkeztu behar duzu Estatuko Enplegu Zerbitzu Publikoan (SEPE), ordainketa okerraren jakinarazpena jaso eta hurrengo 30 eguneko epean, eta zorra exekuzio-bidez biltzen hasi aurretik.

Ordainketa zatitzeko eskaera 30 eguneko epea igaro ondoren aurkezten baduzu, zor denbatekoari epez kanpoko ordainketaren errekargua aplikatuko zaio.

Zatikatze-eskaeran adierazi eta justifikatu beharko dituzu hilero itzul ditzakezun zenbatekoak, zure egoera soziolaborala, ekonomikoa, egoera pertsonalak eta itzulera bermatzeko baldintzak kontuan hartuta.

Ordainketa zatitzeko eskaerak nahitaez honako datu hauek jaso behar ditu: 

a) Zure burua identifikatzeko behar diren datuak eta zorraren zenbatekoa
b) Ordainketa zatitzeko eskaeraren arrazoiak
c) Zatikatze-epea eta eskatzen diren ordainketa-epeak
d) Jakinarazpenetarako hautatutako lekua edo bidea
e) Zorra 150.000 eurotik gorakoa bada, zor nagusia eta egon litezkeen errekarguak estaltzeko gaitasuna bermatu beharko duzu.

Ordainketa zatitzeko eskaerak ez baditu eskatutako baldintzak betetzen, edo beharrezko agiriak aurkezten ez badira, edo hutsuneak edo akatsak ikusten badira, 10 eguneko epea emango zaizu falta zuzentzeko edo beharrezko dokumentazioa aurkezteko. Bestela, zure eskaeran atzera egin duzula ulertuko da eta horren arabera ebazpena emango da.

SEPEk ordainketa zatitzea onartzen badizu, zorrari une bakoitzean indarrean dagoen berandutze-interesa aplikatuko zaio, onarpenetik ordainketa-egunera arte, zatikatzeak irauten duen aldian. 

Aplikagarria den interesa zorraren zenbateko nagusiari aplikatuko zaio eta, hala badagokio, dagokion errekarguari ere bai.

SEPEk, gehienez ere 3 hilabeteko epean, zure ordainketa zatitzeko eskaerari buruzko ebazpena emango du, eskaera erregistroan sartzen den egunetik zenbatzen hasita. Epe hori igaro eta ebazpen espresurik jaso ez baduzu, zure eskaera ezetsitzat joko da.

Ebazpenean honako hauek zehaztu beharko dira:

• Zorraren guztizko zenbatekoa
• Zorrari dagokion aldia 
• Zatikatzearen iraupena eta ordainketa-epeak
• Behar izanez gero, bermeak ezartzeko epeak. 

SEPEk ordainketa zatitzeko eskaera ukatzen badizu, ebazpenean 15 eguneko epe berria emango dizu zorra itzultzeko, jakinarazpena jasotzen duzunetik hasita.