Se se che aboa nun pagamento único a totalidade da prestación pendente de percibir, poderás obter a subvención das cotas á Seguridade Social.

O Servizo Público de Emprego Estatal (SEPE) ou o servizo autonómico correspondente aboará o 50 % da cota ao réxime correspondente da Seguridade Social como persoa traballadora autónoma, calculada sobre a base mínima de cotización, ou ben o 100 % da achega da persoa traballadora ás cotizacións ao réxime correspondente da Seguridade Social.

En ambos os casos, este aboamento realizarase durante o tempo que tería durado a prestación por desemprego de non se ter percibido o pagamento único.

Ademais do pagamento único da prestación por desemprego e do aboamento das cotas á Seguridade Social, se queres constituírte como autónomo ou autónoma, poderás contar tamén coas seguintes axudas:

1. Asistencia técnica.
2. Subvención financeira.
3. Subvención por renda de subsistencia.

No caso de que queiras converterte en autónomo ou autónoma e teñas a condición de persoa con discapacidade, poderás beneficiarte de:

1. Subvención parcial de xuros.
2. Subvención para investimento en capital fixo.

A xestión destas axudas deberás realizala ante a Dirección Provincial do SEPE se resides nas cidades autónomas de Ceuta e Melilla. No caso das comunidades autónomas, deberás dirixirte ao servizo público de emprego autonómico correspondente.

Se solicitas o pagamento único da prestación para constituír unha cooperativa de traballo ou unha sociedade laboral, ou incorporarte como socio ou socia ás mesmas, as axudas que poidas obter deberán ser solicitadas polas propias empresas, que serán as beneficiarias, dentro dos programas de axudas e subvencións ao fomento da economía social.

Poderán ser obxecto de subvención as seguintes actuacións:

• Incorporación de persoas desempregadas como socias traballadoras ou socias de traballo.
• Subvención de xuros de préstamos.
• Axudas de asistencia técnica.
• Subvención de investimentos en activo fixo.
• Subvención para cooperativas de ensino.
• Subvención de actividades de formación, difusión e fomento.
• Axudas a entidades asociativas de cooperativas e sociedades laborais.

Para a información e a xestión destas axudas deberás dirixirte ao organismo autonómico competente, salvo nas cidades de Ceuta e Melilla, onde deberás presentar as solicitudes ante a Dirección Xeral de Fomento da Economía Social e do Fondo Social Europeo.

Máis información en Capitaliza a túa prestación.