Cando recibas a resolución na que se che comunique que percibiches indebidamente unha prestación por desemprego, indicándose a contía exacta que debes devolver, poderás:

• Desde o 21 de decembro de 2023, solicitar a compensación parcial desa contía, o que che permitirá percibir unha parte da prestación ou subsidio recoñecido, sempre que presentes a solicitude antes do inicio da súa recadación en vía executiva.
• Solicitar o pagamento fraccionado da contía percibida indebidamente. 

Se che interesa fraccionar o pagamento, deberás presentar a solicitude por escrito ante o Servizo Público de Emprego Estatal (SEPE) no prazo de 30 días desde a notificación do cobro indebido, e sempre antes do inicio da recadación da débeda en vía executiva.

Se presentas a solicitude de fraccionamento unha vez transcorrido o prazo de 30 días, aplicarase ao importe da débeda a recarga correspondente por pagamento fóra de prazo.

Na solicitude de fraccionamento deberás xustificar os importes mensuais que poidas devolver en función da túa situación sociolaboral e económica, das circunstancias persoais e das garantías para a súa devolución.

A solicitude de fraccionamento deberá incluír necesariamente os seguintes datos: 

a) Os datos necesarios para a túa identificación e o importe da débeda
b) Os motivos da solicitude de fraccionamento
c) O prazo do fraccionamento e os vencementos solicitados
d) O lugar ou medio elixido para os efectos de notificacións
e) Se a débeda supera os 150.000 euros, deberás garantir que podes cubrir o importe principal e, se procede, as recargas correspondentes.

Se a solicitude de fraccionamento non cumprise os requisitos esixidos, non se achegasen os documentos necesarios ou se detectasen erros ou omisións, requiriráselle para que corrixa a falta ou achegue a documentación no prazo de 10 días, advertíndolle de que, de non facelo, se ditará resolución tendo por desistida a solicitude.

Se o SEPE che concede o fraccionamento, á contía debedora aplicaráselle o xuro de mora vixente en cada momento, dende a súa concesión ata o pagamento total, durante todo o período do fraccionamento. 

Devandito xuro aplicarase sobre o principal da débeda e, de ser o caso, sobre a recarga correspondente.

O SEPE ditará a resolución relativa á túa solicitude de fraccionamento nun prazo máximo de 3 meses contados desde a data de entrada da solicitude no rexistro. Se transcorrido ese prazo non recibes resolución expresa, entenderase desestimada.

Na resolución deberá indicarse:

• A contía total da débeda
• O período ao que corresponde a débeda 
• A duración e os vencementos do fraccionamento
• Os prazos para a constitución das garantías, se procede. 

Se o SEPE che denega a solicitude de fraccionamento, a resolución concederache un novo prazo de 15 días para efectuar a devolución desde a súa notificación.