Todas as persoas traballadoras da empresa, con independencia da duración da súa xornada laboral, poden ser incluídas nun procedemento de regulación de emprego.

Porén, se a redución de xornada é por garda legal (coidado directo dun menor de 12 anos ou dunha persoa con discapacidade que non realice unha actividade remunerada), para o cálculo da base reguladora, as bases de cotización computaranse incrementadas ata o 100% do importe que correspondería de manterse, sen redución, a xornada a tempo completo ou parcial. Se a situación legal de desemprego se produce nesa situación de redución de xornada, os importes máximo e mínimo determinaranse tendo en conta o indicador público de rendas de efectos múltiples en función das horas traballadas antes da redución da xornada.

Exemplo: persoa traballadora a xornada completa que reduce a xornada por coidado dun fillo menor de 12 anos ao 50% durante o ano anterior ao inicio da suspensión do contrato por un procedemento de regulación temporal de emprego. As bases de cotización dos últimos 6 meses son de 1.000,00 euros mensuais.
Neste caso, a prestación aboarase tendo en conta unha cotización mensual de 2.000 euros, e a contía fixarase sen aplicar ningún porcentaxe de redución, xa que antes da redución por garda legal a persoa traballadora prestaba servizos o 100% da xornada.

Máis información sobre as prestacións por desemprego derivadas de procedementos de regulación de emprego en: Fíxome efecto un ERE ou un ERTE.