O importe da prestación por desemprego calcúlase tomando como referencia a base reguladora, que é a media das bases de cotización dos últimos 180 días traballados anteriores ao cesamento. Durante os primeiros 180 días, a prestación será do 70 % da base reguladora; a partir do día 181, pasará a ser do 60 %. Se nos últimos 180 días cotizados tiveses varios contratos a tempo parcial con diferentes porcentaxes de xornada, deberase calcular unha media en función dos días cotizados.

As contías resultantes deste cálculo non poden ser inferiores ao límite mínimo nin superiores ao máximo fixado pola lei, segundo o indicador público de rendas de efectos múltiples (IPREM) e en función de se existen ou non fillos ou fillas ao cargo. No caso de variación da porcentaxe da xornada, este límite aplicarase á media obtida.