En primeiro lugar, cómpre diferenciar se vas percibir unha prestación contributiva ou unha prestación asistencial (subsidio).

No caso de que se trate dunha prestación contributiva, as fillas e fillos que teñas ao teu cargo, menores de 26 anos ou maiores desa idade con discapacidade, así como os menores acollidos que non perciban rendas, poderán incrementar os límites mínimos ou máximos da prestación.

Se accedes a un subsidio, entenderase que existen responsabilidades familiares cando teñas ao teu cargo o cónxuxe, fillas e fillos menores de 26 anos ou maiores incapacitados, ou menores acollidos, sempre que a renda do conxunto da unidade familiar, incluída a persoa solicitante, dividida polo número de membros que a compoñen, non supere o 75 % do salario mínimo interprofesional, excluída a parte proporcional de dúas pagas extraordinarias.

Por este motivo, podes acreditar responsabilidades ou cargas familiares respecto do cónxuxe, pero non respecto dunha parella de feito.

Se es unha persoa separada legalmente ou divorciada, consideraranse cargas familiares as fillas e fillos comúns do matrimonio cando convivan contigo, sempre que cumpran os requisitos de idade (menores de 26 anos ou maiores con discapacidade) e carezan de rendas propias.

Se non conviven contigo pero tes a obriga, establecida por sentenza ou convenio regulador, de aboar unha pensión de alimentos, tamén se considerarán cargas familiares se cumpren os requisitos indicados.

A separación de feito, cando non se presentou demanda de nulidade, separación ou divorcio ou o xuíz non ditou medidas provisionais, non supón a disolución do vínculo matrimonial e os cónxuxes seguen obrigados a asumir as cargas do matrimonio.

A separación de feito non altera a composición da unidade familiar nin o sistema de cálculo das rendas, polo que non se excluirá o cónxuxe nin as súas rendas. Non obstante, poderás excluír o teu cónxuxe da unidade familiar se xustificas que a demanda de nulidade, separación ou divorcio foi admitida a trámite, aínda que non exista sentenza nin resolución xudicial con medidas provisionais.

No caso de matrimonio, se o teu cónxuxe ten fillas ou fillos doutra relación e conviven co matrimonio, formarán parte da unidade de convivencia e poderás alegalos como carga, sempre que sexan menores de 26 anos ou maiores con discapacidade, ou menores en acollida, e cumpran o requisito de non percibir rendas superiores ao 75 % do salario mínimo interprofesional.

Pola contra, se tes parella de feito, as fillas e fillos da túa parella non poderán alegarse como carga nin se terán en conta os seus ingresos para determinar se existen responsabilidades familiares. Así mesmo, tampouco poderás considerar como carga á túa parella de feito.

Como excepción, se es vítima de violencia de xénero, para establecer se existen cargas familiares non se considerará membro da unidade familiar o agresor, nin se terán en conta as súas rendas.