Se abandonas un traballo de maneira voluntaria, non podes percibir a prestación por desemprego. A normativa establece que, para ter dereito ao paro, a finalización da relación laboral non pode ser por decisión propia, xa que o sistema de protección por desemprego está dirixido a persoas que queren e poden traballar pero carecen de emprego.

Se posteriormente traballas noutra empresa e volves cesar por non superar o período de proba por decisión do empresario ou da empresaria, e non pasaron máis de tres meses desde que deixaches voluntariamente o traballo anterior, tampouco terás dereito á prestación. Pola contra, si poderás cobralo se o cesamento involuntario na segunda empresa se produce por un motivo distinto ao período de proba (por exemplo, por finalización do contrato), con independencia do tempo transcorrido desde a baixa voluntaria anterior.

Se, tras cesar dúas veces por non superar o período de proba por decisión empresarial, comezas un novo traballo que tamén finaliza polo mesmo motivo, só terás dereito á prestación por desemprego se entre o segundo e o terceiro cesamento transcorren, cando menos, tres meses.