A FUNDACIÓN FUNDETEC PREMIA O SEPE POLO PORTAL EMPLÉATE

05 de marzo de 2015

Premio FUNDETEC 2014

O 5 de marzo de 2015 tivo lugar a entrega dos premios anuais da Fundación para o Desenvolvemento Infotecnolóxico de Empresas e Sociedade (FUNDETEC), consolidados como un referente no ámbito da Sociedade da Información. Os premios recoñecen o labor de entidades que impulsan o uso das Tecnoloxías da Información e a Comunicación (TIC) entre cidadáns e empresas, a competitividade de pemes e autónomos e a mellora dos servizos da cidade intelixente.

Nesta décima edición, o premio 'Mellor Proxecto de entidade pública para a Cidadanía 2014' correspondeu ao servizo de Emprego Público Estatal (SEPE) polo Portal Empléate, posto en marcha en xullo de 2014 e cuxo obxectivo é reunir nun único sitio web todas as ofertas de emprego público do Estado e as comunidades autónomas, así como das entidades privadas de intermediación laboral que desexen adherirse ao proxecto, co fin de facilitar a busca de emprego aos demandantes e mellorar a súa experiencia dixital. Pola súa banda, os ofertantes poden acceder a unha ampla bolsa de candidatos para poder seleccionar o máis axeitado para o posto que desexan cubrir.

A cerimonia de entrega de premios, presentada pola xornalista Lourdes Maldonado, tivo lugar no Museo do Traxe de Madrid, nun acto que contou coa presenza de preto de 200 persoas, entre elas representantes da Administración Central, Autonómica e Local, así como directivos de empresas, fundacións e asociacións de primeiro nivel.

Durante o seu discurso, o director xeral de Fundetec, Alfonso Arbaiza, quixo facer unha homenaxe a "todas aquelas persoas que, ao longo destes 10 anos, contribuíron co seu tempo e o seu esforzo a conseguir o espectacular avance que experimentou a Sociedade da Información no noso país nesta década".

O xurado encargado de elixir os proxectos gañadores, entre un total de 91 candidaturas, estivo presidido por Víctor Calvo-Sotelo, presidente de Fundetec e Secretario de Estado de Telecomunicacións e para a Sociedade da Información.

Os catro gañadores recibiron como premio o trofeo 'Xogo na Rede', un mosaico de vidro esmaltado sobre madeira, exemplar exclusivo creado polo artista José Luis Berrocal. A obra está inspirada nun xogo de parchís cuxo obxectivo é alcanzar a arroba central, que representa a Sociedade da Información.