As prestacións e subsidios por desemprego son compatibles coa realización de prácticas formativas en empresas, institucións ou entidades incluídas en programas de formación e a realización de prácticas académicas externas. A realización das prácticas determinará a inclusión no sistema da Seguridade Social das persoas que as realicen.

Estas prácticas poden ser:

• Realizadas por alumnos universitarios e alumnas universitarias, dirixidas a:
  • a obtención de titulacións oficiais de grao e máster, doutoramento, ou
  • a obtención dun título propio da universidade, xa sexa un máster de formación permanente, un diploma de especialización ou un diploma de experto.
• Realizadas por alumnos e alumnas de formación profesional, sempre que as mesmas non se presten no réxime de formación profesional intensiva (realízase alternando a formación no centro de formación profesional coa actividade produtiva e retribuída no marco dun contrato de formación).
• Realizadas por alumnos e alumnas de Ensinos Artísticos Superiores, ensinos artísticos profesionais e ensinos deportivos do sistema educativo.

A partir do 23 de maio de 2024 , as percepcións económicas que se perciban polas persoas asistentes ás estas prácticas non deberán ser computadas como rendas tanto se as percibe a persoa beneficiaria, como se o fai calquera outro membro da súa unidade familiar.

Tanto se se trata de prácticas remuneradas como non remuneradas, existe obriga de alta na Seguridade Social como asimilados a traballadores por conta allea, excluíndose da acción protectora a protección por desemprego, así como a cobertura do Fondo de Garantía Salarial e por Formación Profesional. No suposto de prácticas non remuneradas excluirase tamén a protección por incapacidade temporal derivada de continxencias comúns.

Podes obter máis información no teléfono de atención á cidadanía.