As empresas afectadas polas inundacións ocorridas no mes de febreiro de 2026 en determinados municipios de Andalucía e Estremadura poden solicitar un Expediente de Regulación Temporal de Emprego (ERTE) por forza maior ou por causas económicas, técnicas, organizativas ou de produción (ETOP) para os seus traballadores e traballadoras, segundo recolle o artigo 47 do Estatuto dos Traballadores.
As medidas que se poden adoptar son a suspensión temporal do contrato de traballo ou a redución da xornada das persoas traballadoras.

Quen solicita as prestacións ERTE de forza maior ou ETOP? 

Son as empresas de Andalucía e Estremadura que se viron afectadas polas inundacións do mes de febreiro de 2026 as que deben realizar as comunicacións pertinentes respecto do ERTE e a solicitude colectiva de prestacións para o seu persoal. 

As solicitudes que deben realizar as empresas son as seguintes:

• Primeiro, deben presentar o ERTE ante a Autoridade Laboral.
  Se é un ERTE derivado de forza maior, debe ser aprobado previamente por esta. Se é un ERTE por causas económica, técnicas organizativas ou de produción (ETOP), debe ser comunicado a esta mesma autoridade.
• Segundo, deben presentar unha solicitude colectiva para as persoas traballadoras afectadas e presentala ante o SEPE a través da súa Sede Electrónica, unha vez aprobado o ERTE de forza maior ou comunicado o ERTE ETOP.

Se en 5 días non se recibiu resposta da Autoridade Laboral respecto do ERTE de forza maior, considerarase aprobado por silencio administrativo positivo e poderá presentarse a solicitude colectiva de prestacións ante o SEPE. 

Como deben realizar as empresas a solicitude colectiva de prestacións ERTE de forza maior ou ETOP ante o SEPE?

Unha vez aprobado o ERTE-inundacións pola Autoridade Laboral ou tras 5 días por silencio positivo, ou tras comunicación do ERTE ETOP, as empresas, para o recoñecemento e pago das prestacións, efectuarán as seguintes comunicacións na Sede Electrónica do SEPE.

1. Presentación da SOLICITUDE COLECTIVA na plantilla Excel oficial publicada na sede do SEPE, en Empresas/Certific@2, servizo de Remisión de solicitudes colectivas para o recoñecemento das prestacións por ERTE a causa dos desastres naturais (DANA de outubro de 2024 e inundacións de febreiro de 2026).
2. Transmisión previa do CALENDARIO DE ACTIVIDADE para o seguimento por parte da Inspección de Traballo e Seguridade Social (ITSS) a través do servizo Empresas/Certific@2/ Transmisión previa de datos sobre despedimentos colectivos, suspensión da relación laboral e redución de xornada prevista na Orde ESS/982/2013. 
3. Remisión dos FICHEIROS DE PERÍODOS DE ACTIVIDADE (XML) mensualmente a través do servizo Empresas/Certific@2/Comunicación de Períodos de Actividade, según se informa na guía básica de tramitación que se facilita na web e na sede do SEPE. 

O prazo para a presentación da solicitude colectiva será dun mes, a computar desde unha das seguintes datas:

• Nos casos de ERTE de forza maior, desde a data da notificación á empresa da resolución da autoridade laboral constatando a forza maior, ou, no seu caso, desde a data en que se entenda estimada a súa solicitude por silencio administrativo.
• Nos casos de ERTE ETOP desde a data da comunicación da empresa á autoridade laboral da súa decisión da adopción da medida temporal de que se trate.

Se se presenta fóra de prazo, o dereito nacerá o día da solicitude. Neste suposto, a empresa deberá abonar ás persoas afectadas o importe que percibirían en concepto de prestación por desemprego desde o primeiro día en que se aplicase a medida de suspensión do contrato ou da actividata, ou de redución de xornada, ata o día anterior ao da presentación da solicitude colectiva.